परंडा, दि. ११-आपल्या शाळेत शिकणाऱ्या एका १५ वर्षीय विद्यार्थिनीस मोबाइलवर वेगवेगळे संदेश पाठवून तिला लग्नासाठी दबाव आणणाऱ्या नराधम शिक्षकाविरुध्द परंडा पोलीस ठाण्यात गुन्हा दाखल करण्यात आला आहे. आरोपी हा भूम तालुक्यातील ईडा येथील रहिवासी आहे. परंडा तालुक्यातील एका शाळेत भूम तालुक्यातील ईडा येथील आरोपी धनंजय शिंदे हा
शिक्षक म्हणून नोकरीस आहे. त्याने त्याच्या वर्गातील १५ वर्षीय विद्यार्थिनीला व्हॉट्सअॅप, स्नॅपचॅट व अन्य मोबाइल अॅपच्या माध्यमातून संपर्क करायचा. त्याने मागील एक वर्षापासून तिला वेगवेगळे संदेश पाठवून लग्नासाठी दबाव टाकला होता. ‘मला तू खूप आवडतेस, मला तुझ्याबरोबर लग्न करायचे आहे. तुझ्या-माझ्या वयात खूप अंतर पडत आहे. तू मला हवी आहेस’ असे मेसेस पाठवत होता. शाळेत गेल्यावर संबंधित मुलीस आरोपी शिक्षक म्हणाला की, ‘तुझ्या दाजीचा फोन आला होता. मी मॅनेज करतो म्हणाले. त्यामुळे तू आता लग्नाचे टेंशन घेऊ नको’, असे बोलून विद्यार्थिनीला पुन्हा पुन्हा मोबाइलवर दबाव टाकून लग्नासाठी मागणी करत राहिला. त्यामुळे संतप्त अल्पवयीन मुलीने हा सर्व प्रकार आपल्या आई- वडिलांस सांगितला. त्यानंतर मुलीच्या आई-वडिलांनी पोलिसात धाव घेतली. सोमवारी रात्री त्यांनी पोलिसांत तक्रार दाखल केली. त्यानंतर अवघ्या दोन तासात आरोपी धनंजय शिंदे यास अटक करण्यात आले. मंगळवारी त्यास परंडा येथील अतिरिक्त सत्र न्यायालयात हजर केले असता, न्यायालयाने त्याची न्यायालयीन कोठडीत रवानगी केली आहे. घटनेचा अधिक तपास भूम येथील पिंक पथकाच्या प्रमुख तथा पोलीस उपनिरीक्षक वर्षा साबळे या करीत आहेत.
Discover more from माझं गांव माझं शहर (बातमीपत्र)
Subscribe to get the latest posts sent to your email.